UMILIKI WA BUNDUKI MAREKANI NI MJADALA USIOKWISHA

 

Suala la umiliki wa bunduki nchini Marekani ni jambo lililo katika mjadala ya muda mrefu kwa sasa nchini humo likianzia katika historia ya nchi hiyo. Kwa mujibu wa utafiti wa hivi karibuni kutoka kituo cha utafiti cha  Pew  na Legal Reader, takriban asilimia 32 ya watu wazima sawa na watu zaidi ya milioni 84 wanamiliki bunduki binafsi. 

Nyumba zaidi ya asilimia 50 nchini humo, sawa na nyumba milioni 66.5, zinakadiriwa kuwa na bunduki angalau moja. Jumla ya bunduki zinazomilikiwa na raia wa Marekani imefikia zaidi ya milioni 500, ikiwa ni wastani wa bunduki moja na nusu kwa kila mtu mzima katika nchi hiyo yenye idadi ya watu milioni 341.1 hadi  Januari 1, 2025 kwa mujibu wa tovuti ya sensa. Hii inaifanya Marekani kuwa nchi yenye kiwango cha juu zaidi cha umiliki wa bunduki duniani.

Sababu kuu zinazowasukuma watu kumiliki bunduki ni pamoja na kutafuta usalama binafsi, ambapo asilimia 72 ya wamiliki wanasema wanahitaji kujilinda dhidi ya uhalifu. Sababu nyingine ni uwindaji, michezo ya risasi, na pia kumiliki bunduki kama sehemu ya urithi wa familia au kwa sababu za kihistoria na kikatiba hasa haki ya kumiliki silaha chini ya Marekebisho ya Pili ya Katiba ya Marekani. Vilevile, kumekuwa na ongezeko kubwa la umiliki wa bunduki miongoni mwa wanawake na watu wa jamii ya Kihispania katika kipindi cha miaka kumi iliyopita. 

Hata hivyo, ongezeko la umiliki wa bunduki limesababisha athari mbalimbali. Ripoti kutoka taasisi ya Pew Research na  Kituo cha Kidhibiti na Kuzuia Magonjwa (CDC) zinaonesha kuwa matukio ya vifo vinavyosababishwa na bunduki ikiwemo mauaji, kujiua, na ajali yameendelea kuwa tatizo kubwa. Kwa mwaka 2023 pekee, takriban watu 48,000 walifariki kutokana na visa vinavyohusiana na bunduki. 

Aidha, ongezeko la bunduki limekuwa changamoto kubwa katika kushughulikia mashambulizi ya kiholela yanayohusisha watu wengi, ambayo mara nyingi husababisha vifo vingi kwa wakati mmoja na kuibua mijadala mikali ya kisiasa juu ya udhibiti wa silaha.

Moja ya vikundi vinavyochangia sana kuhamasisha umiliki wa bunduki nchini Marekani ni Umoja wa Kitaifa wa Wamiliki wa Bunduki (NRA) . Umoja huu una nguvu kubwa kisiasa na kifedha, na linapigania haki ya kumiliki bunduki kwa nguvu kubwa, likitetea kila hatua ya kupunguza sheria za udhibiti wa silaha. 

Kwa kutumia kampeni za matangazo, mafunzo ya bunduki, na ushawishi kwa wanasiasa, NRA huchochea jamii na wafuasi wake kumiliki bunduki zaidi kama njia ya kulinda uhuru wao na haki zao za kikatiba. Hii imesaidia kuimarisha utamaduni wa silaha na kuongeza hesabu ya wamiliki wa bunduki nchini Marekani.

Kwa ujumla, suala la umiliki wa bunduki nchini Marekani linaendelea kuwa nyeti na lenye pande mbili, moja ikiwa ni haki ya kujilinda na nyingine ikiwa ni tishio kwa usalama wa umma. Majadiliano kuhusu udhibiti wa bunduki yanaendelea, huku wengi wakitaka sheria kali zaidi, na wengine wakisisitiza kulindwa kwa haki ya kumiliki silaha.